ភាពកខ្វក់នៃបន្ទះក្ដារចុចកុំព្យូទ័រ
នាទីឯកទេស
អត្ថបទជាលាយលក្សអក្សរ
ភាពកខ្វក់នៃបន្ទះក្ដារចុចកុំព្យូទ័រ
ការរកឃើញថ្មី នៃការសិក្សាអំពីភាពកខ្វក់នៃក្ដារចុចកុំព្យូទ័រនៅតាមបណ្ដាការិយាល័យជាច្រើនបានឲ្យដឹងថា ក្ដារចុចកុំព្យូទ័រ ឬ Keyboard អាចមានផ្ទុកបាក់តេរីច្រើនជាងកៅអីបង្គន់ទៅទៀត។ ការរកឃើញនេះ បានធ្វើឲ្យបុគ្គលិកការិយាល័យជាច្រើនមានការភ្ញាក់ផ្អើលខ្លាំងមិនគួរឲ្យជឿសោះ។ ការរកឃើញថ្មីនេះ បានឲ្យដឹងថា មេរោគ និងបាក់តេរីដែលមាននៅជាប់នឹងបន្ទះក្ដារកុំព្យូទ័រនៅលើតុតាមបណ្ដាការិយាល័យ អាចធ្វើឲ្យអ្នកប្រើប្រាស់ឆ្លងជំងឺផ្ដាសាយ ឬក៏ធ្វើឲ្យមានបញ្ហាឈឺពោះជាដើម។ 22/05/2008
លោក លោកស្រី និងប្រិយមិត្ដអ្នកស្ដាប់វិទ្យុអូស្រ្ដាលីខេមរភាសាជាទីមេត្រី! នៅថ្ងៃនេះ នាទីវិទ្យាសាស្រ្ដ និងបច្ចេកវិទ្យានៃវិទ្យុយើងមានសេចក្ដីសោមនស្សរីករាយ ដោយបានវិលមកជួបប្រិយមិត្ដទាំងអស់ជាថ្មីម្ដងទៀត។ នៅថ្ងៃនេះ យើងនឹងរាយការណ៍ជូនអំពីភាពកខ្វក់នៃក្ដារចុចកុំព្យូទ័រ ឬដែលភាសាអង់គ្លេសថា Keyboard ដោយសារវាមានផ្ទុកទៅដោយបាក់តេរី និងមេរោគយ៉ាងច្រើនដែលយើងមិននឹកស្មានដល់។ ចាស! តើការរកឃើញថ្មីនេះ មានប្រយោជន៍យ៉ាងណាដល់មិត្ដអ្នកស្ដាប់នោះ តទៅទៀតនេះ លោក ឃុន អាឡិច សូមជំរាបជូននូវរបាយការណ៍វិទ្យាសាស្រ្ដពិស្ដារជុំវិញរឿងនេះចាស!
សម្លេងក្ដារចុចកុំព្យូទ័រ
បាទ! ការរកឃើញថ្មី នៃការសិក្សាអំពីភាពកខ្វក់នៃក្ដារចុចកុំព្យូទ័រនៅតាមបណ្ដាការិយាល័យជាច្រើនបានឲ្យដឹងថា ក្ដារចុចកុំព្យូទ័រ ឬ Keyboard អាចមានផ្ទុកបាក់តេរីច្រើនជាងកៅអីបង្គន់ទៅទៀត។ ការរកឃើញនេះ បានធ្វើឲ្យបុគ្គលិកការិយាល័យជាច្រើនមានការភ្ញាក់ផ្អើលខ្លាំងមិនគួរឲ្យជឿសោះ។ ការរកឃើញថ្មីនេះ បានឲ្យដឹងថា មេរោគ និងបាក់តេរីដែលមាននៅជាប់នឹងបន្ទះក្ដារកុំព្យូទ័រនៅលើតុតាមបណ្ដាការិយាល័យ អាចធ្វើឲ្យអ្នកប្រើប្រាស់ឆ្លងជំងឺផ្ដាសាយ ឬក៏ធ្វើឲ្យមានបញ្ហាឈឺពោះជាដើម។
បាទ! ចំពោះមិត្ដអ្នកស្ដាប់ដែលមានវ័យក្មេងខ្លះប្រាកដជាមានម្ដាយ/ឪពុកធ្លាប់ណែនាំអប់រំហើយថា ក្រោយពីទៅបង្គន់ត្រូវលាងសំអាតដៃនឹងសាប៊ូឲ្យស្អាត។ ប៉ុន្ដែឥឡូវនេះ នៅក្នុងប្រទេសអូស្រ្ដាលីវិញ មាតាបិតាអាចត្រូវណែនាំប្រាប់កូនបន្ថែមទៀតថា ក្រោយពីប្រើប្រាស់កុំព្យូទ័ររួច ក៏ត្រូវទៅលាងសំអាតដៃផងដែរ។ លោក John Boag ពីក្រុមហ៊ុនមួយដែលមានមូលដ្ឋាននៅក្រុងឡុងដ៍ សិក្សាអំពីអតិថិជន បានពន្យល់អំពីបាក់តេរីដែលកកើតនៅលើក្ដារចុចកុំព្យូទ័រ ប្រសិនបើមិនមានការសំអាតជាទៀងទាត់ទេនោះ។
សម្លេងលោក John Boag ៖ ?បាទ! ប្រភេទបាក់តេរីដែលកកើតឡើងនៅលើក្ដារចុចកុំព្យូទ័រដោយសារយើងមិនបានសំអាតវានោះ មានទម្រង់ជាបាក់តេរីខូលី (coli) ដែលមនុស្សជាច្រើនបានស្គាល់ដូចជា បាក់តេរីប្រភេទអ៊ីខូឡាយ និងប្រភេទ ស្ដាហ្វ៊ីឡូខូខើស (staphylococcus)។ បាក់តេរីទាំងនេះ អាចធ្វើឲ្យយើងឈឺដូចជាពុលអាហារជាដើម។ អ្នកដឹងទេ ជំងឺដូចជាការរាករូស ការក្អួតចង្អោរជាដើម។?
លោក John Boag មកពីក្រុមហ៊ុនសិក្សាអំពីអតិថិជន ដែលមានមូលដ្ឋាននៅក្រុងឡុងដ៍ប្រទេសអង់គ្លេសបានធ្វើតេស្ដនៅការិយាល័យរបស់លោក ហើយរកឃើញថា ក្នុងចំណោមក្ដារចុចកុំព្យូទ័រចំនួន៣៣ មានក្ដារចុចកុំព្យូទ័រចំនួន៤ ដែលបង្កឲ្យមានគ្រោះថ្នាក់ដល់សុខភាពយ៉ាងខ្លាំង។ ហើយក្នុងនោះ មានក្ដារចុចកុំព្យូទ័រមួយដែលមានផ្ទុកទៅដោយបាក់តេរី និងមេរោគច្រើនជាងកៅអីបង្គន់ដល់ទៅ៥ដង ឯណោះ។ មិត្ដអ្នកស្ដាប់អាចគិតបន្ដិច ហើយធ្វើការសន្និដ្ឋានបានទេថា តើបញ្ហានេះបណ្ដាលមកពីអ្វី? ខ្ញុំទុកពេលឲ្យមិត្ដអ្នកស្ដាប់គិតបន្ដិចសិន ដើម្បីឲ្យខ្ញុំអាចមានពេលទៅសំអាតតុ និងក្ដារចុចកុំព្យូទ័រ កុំឲ្យឆ្លងមេរោគធ្វើឲ្យឈឺពោះ ហើយខ្ញុំក៏នឹងទៅផ្ញើអ៊ីមែលឆ្លើយឆ្លងទៅមិត្ដអ្នកស្ដាប់វិទ្យុអូស្រ្ដាលីផងដែរ ដែលបានផ្ញើអ៊ីមែលមកឲ្យវិទ្យុយើងខ្ញុំ។
សម្លេងក្ដារចុចកុំព្យូទ័រ
ឥឡូវនេះ សូមផ្ទៀងការគិតរបស់មិត្ដអ្នកស្ដាប់នឹងមូលហេតុដែលគេបានរកឃើញ។ បាទ! មូលហេតុដែលក្ដារចុចកុំព្យូទ័រនេះ មានបាក់តេរី និងមេរោគច្រើនគឺមួយផ្នែកដោយសារតែការមិនបានលាងសំអាតដៃត្រឹមត្រូវ តែមួយផ្នែកធំទៀតនោះ គឺថាអ្នកធ្វើការដែលប្រើប្រាស់កុំព្យូទ័របានយកម្ហូបអាហារមកទទួលទាននៅកន្លែងតុធ្វើការ។ ហើយនេះ គឺជាប្រសាសន៍របស់លោក John Boag ដែលបានធ្វើការអត្ថាធិប្បាយពន្យល់។
សម្លេងលោក John Boag ៖ ?បាទ! បញ្ហានោះគឺបណ្ដាលមកពីអ្នកធ្វើការបានកំពប់អាហារដូចជាកំទេចនំប៉័ងជាដើមហ្នឹងចូលទៅក្នុងរន្ធតូចៗជាច្រើននៅតាមក្ដារចុចកុំព្យូទ័រ។ ដូច្នេះវាហាក់ដូចជាកន្លែងមួយដែលបង្កលក្ខណៈងាយស្រួលឲ្យបាក់តេរី និងមេរោគ បង្កបង្កើតកូនចៅ។ ដូច្នេះវិធីល្អបំផុតដើម្បីចៀងវៀងបញ្ហាបែបនេះ គឺថាប្រសិនបើអ្នកនឹងញ៉ាំអាហារនៅលើតុធ្វើការនោះ ត្រូវដាក់ក្ដារចុចកុំព្យូទ័រទៅឲ្យឆ្ងាយ ដើម្បីកុំឲ្យអាហារកំពប់ធ្លាក់ទៅលើ។?
បើតាមការសិក្សាស្រាវជ្រាវធំដុំមួយមានលក្ខណៈទូលំទូលាយជាងនេះ នៅសកលវិទ្យាល័យ Arizona នៅសហរដ្ឋអាម៉េរិកកាលពីឆ្នាំទៅមិញបានឲ្យដឹងថា គេបានរកឃើញលទ្ធផលមិនល្អដូចគ្នាដែរ។ លោក Chuck Gerba សាស្រ្ដាចារ្យខាងជីវវិទ្យាបរិស្ថាននៅសកលវិទ្យាល័យ Arizona បានឲ្យដឹងថា៖
សម្លេងលោក Chuck Gerba ៖ ?នៅក្នុងការសិក្សានោះ យើងបានកត់សម្គាល់ឃើញថា បណ្ដាអ្នកប្រើប្រាស់ក្ដារចុចកុំព្យូទ័រ មិនចាប់ផ្ដើមធ្វើការសំអាតក្ដារចុចនោះឡើយរហូតទាល់តែគេប៉ះវាទៅស្អិតតតាត់។ តាមពិតទៅបណ្ដាជនហាក់ដូចជាមិនសូវគិតគូរច្រើនឡើយអំពីអនាម័យនៅតាមការិយាល័យ។ ហើយមិនតែប៉ុណ្ណោះនៅតាមតុការិយាល័យនីមួយៗ ដោយសារបណ្ដាជនមានការយល់ឃើញថា វាជាកន្លែងបុគ្គលម្នាក់ៗរៀងៗខ្លួន។ ដូច្នេះហើយអ្នកដទៃ ដូចជាអ្នកបោសសំអាតជាដើមមិនហ៊ានទៅប៉ះពាល់កន្លែងធ្វើការងាររបស់បុគ្គលិកនីមួយៗឡើយ។ ដូច្នេះ ប្រសិនបើបុគ្គលិកខ្លួនឯងហ្នឹងមិនសំអាតខ្លួនឯងទេនោះ គ្មាននរណាគេមកសំអាតឲ្យនោះឡើយ។ ខ្ញុំគិតថា វាពិតជាសំខាន់ណាស់ចំពោះមនុស្សច្រើននាក់ប្រើប្រាស់កន្លែងធ្វើការ ឬកុំព្យូទ័ររួមគ្នានោះ។ អ្នកគួរតែមានការប្រុងប្រយ័ត្នចំពោះអនាម័យផងដែរ ពីព្រោះអ្នកក៏អាចឆ្លងមេរោគរួមគ្នាដែរ។ ដូច្នេះប្រសិនបើអ្នកញ៉ាំអាហារនៅកន្លែងតុធ្វើការងារនោះ អ្នកត្រូវតែចំណាយពេលផ្ទាល់ខ្លួនដើម្បីសំអាតបាក់តេរី ឬមេរោគនៅលើតុ ឬក្ដារចុចកុំព្យូទ័រនោះ។?
ម្យ៉ាងវិញទៀតនោះ មនុស្សភាគច្រើនមានការយល់ច្រឡំថា ស្រ្ដីភាគច្រើនមានអនាម័យជាងបុរស។ តែបើតាមប្រសាសន៍របស់លោកបណ្ឌិត Chuck Gerba ពីសកលវិទ្យាល័យ Arizona នៅសហរដ្ឋអាម៉េរិកបានឲ្យដឹងថា តុធ្វើការរបស់ស្រ្ដីមានបាក់តេរី និងមេរោគច្រើនជាងតុរបស់បុរសដល់ទៅ៣ដងឯណោះ។
សម្លេងលោក Chuck Gerba ៖ ?បាទ! ស្រ្ដីមានទំនោរច្រើនតែទុកអាហារផ្លែឈើនៅលើតុរបស់គេ ច្រើនជាងបុរស។ មានស្រ្ដីប្រមាណ៧០% ទុកអាហារផ្លែឈើនៅលើតុរបស់គេ ប្រើប្រៀបធៀបនឹងបុរសវិញមានតែ៥០%ប៉ុណ្ណោះ។ ដូច្នេះ មេរោគ និងបាក់តេរីមានចំណីអាហារស៊ីច្រើន នៅលើតុស្រ្ដី ជាងនៅលើតុបុរស។?
បាទ! ឥឡូវនេះ សូមខាងស្រ្ដីកុំបារម្ភ និងអាក់អន់ចិត្ដអី ពីព្រោះថា បើតាមអ្នកឯកទេស គេបានឲ្យដឹងថា បញ្ហានេះ គេអាចដោះស្រាយបានយ៉ាងងាយ។ លោកបណ្ឌិត Chuck Gerba បានបន្ដផ្ដល់ការបកស្រាយជុំវិញការមានអនាម័យយ៉ាងដូច្នេះថា៖
សម្លេងលោក Chuck Gerba ៖ ?ការមានទម្លាប់សំអាតដៃគឺជាការល្អ។ អ្នកត្រូវសំអាតដៃឲ្យបានទៀងទាត់ ដើម្បីឲ្យជាទម្លាប់ ហើយប្រសិនបើអាចធ្វើបាន ប្រើថ្នាំសម្លាប់មេរោគដើម្បីសំអាតដៃ។ បាទ! តាមពិតទៅអ្នកក៏អាចប្រើថ្នាំកំចាត់មេរោគបានដែរ ដើម្បីជូតសំអាតតុ ទូរស័ព្ទ សំអាតក្ដារចុចកុំព្យូទ័រជាដើម ពីព្រោះរបស់ទាំងនេះមានកាន់បាក់តេរី និងមេរោគច្រើនជាងគេ។?
កល្យាណមិត្ដអ្នកស្ដាប់ទាំងអស់ជាទីមេត្រី ប្រទេសអូស្រ្ដាលី អង់គ្លេស ឬអាមេរិកមានការជឿនលឿនបែបនេះទៅហើយ គេនៅតែមានបញ្ហាអនាម័យនៅតាមតុការិយាល័យ។ ដូច្នេះវាគឺជាទម្លាប់ល្អដែលយើងជាអ្នកប្រើប្រាស់របស់ទាំងនោះ ទម្លាប់មានអនាម័យខ្លួនឯងដើម្បីជាប្រយោជន៍ការពារសុខភាពរៀងៗខ្លួន។ ពីព្រោះថា បើឈឺទៅគ្មាននរណាគេមកឈឺជំនួសយើងនោះទេ។ ដូច្នេះការចាត់វិធានការមានទម្លាប់អនាម័យល្អខ្លួនឯងគឺជាការប្រសើរ។ បើតាមការសិក្សាស្រាវជ្រាវនេះ ក៏បានឲ្យដឹងផងដែរថា នៅក្នុងចំណោមអ្នកប្រើប្រាស់កុំព្យូទ័រទាំងឡាយ មាន១០% មិនដែលសំអាតក្ដារចុចកុំព្យូទ័ររបស់ខ្លួនឡើយ។ ហើយមាន ២០% មិនដែលសំអាតឧបករណ៍កណ្ដុរ ឬអង់គ្លេសហៅថា Mouse នោះឡើយ៕
ប្រិយមិត្ដអ្នកស្ដាប់ទាំងអស់ជាទីមេត្រី! នាទីវិទ្យាសាស្រ្ដ និងបច្ចេកវិទ្យានៃវិទ្យុអូស្រ្ដាលីខេមរភាសារបស់យើងទើបជំរាបជូនដោយខ្ញុំបាទ ឃុន អាឡិច នៅពេលនេះ ត្រូវដល់ពេលចប់តែត្រឹមនេះ។ នៅសប្ដាហ៍ក្រោយ ខ្ញុំនឹងវិលមកជួបមិត្ដអ្នកស្ដាប់ទាំងអស់ជាថ្មីម្ដងទៀតដោយនឹងមានជូនប្រធានបទវិទ្យាសាស្រ្ដថ្មីទាក់ទងនឹងការវិវឌ្ឍនៃវិស័យនេះ។ ហើយសូមជំរាបផងដែរថា ប្រិយមិត្ដក៏អាចចូលស្ដាប់កម្មវិធីផ្សាយរបស់យើងនៅលើវ៉ិបសាយត៍របស់វិទ្យុអូស្រ្ដាលីបានដែរនៅ radioaustralia.net.au/khmer។ សូមអរគុណចំពោះការតាមដានស្ដាប់៕
(រៀបចំផលិតកម្មវិធីដោយ ឃុន អាឡិច)
បញ្ចេញ មួយចំលើយតប